Mis qabın mərkəzində məscid təsviri verilmiş, ətrafı isə İslamın müqəddəs kitabı olan Qurani-Kərimdən ayələrlə naxışlanmışdır. Xarici haşiyədə "Maidə" surəsinin 13-cü ayəsi həkk olunub: "Onları əfv et və (təqsirlərindən) keç. Şübhəsiz ki, Allah yaxşılıq edənləri sevir". Minarələrin yuxarı hissələri nəbati motivlər və quş təsvirləri ilə bəzədilmişdir. Bir çox xalqların folklorunda və mədəniyyətində rast gəlinən müxtəlif quş təsvirləri özünəməxsus rəmzi məna daşıyır. Beləliklə, quşlar sadəcə təbiət canlıları deyil, həm də səmanın dili və ilahi ruhun simvolu hesab olunur.